'n Welbekende Suid-Afrikaanse tuinboughoeroe is onlangs nóg 'n internasionale veer in die hoed gesteek.
Met sy tuin genaamd "Living Contours" het Leon Kluge 'n goue toekenning by die Shenzhen-internasionale blommeskou in China ingepalm.
Die skou lok jaarliks bykans 'n halfmiljoen besoekers wat na 34 tuininstallasies kom kyk.
Kluge se landskapvermoëns is al met talle toekennings bekroon, waaronder verskeie goue medaljes by die Chelsea-blommeskou in Londen.
Hy het Dinsdag op tuisbodem aangeland en vanuit Franschhoek in die Wes-Kaap met eNuus gesels.